Улаанбаатар хотын иргэд 2 давхар автобусаар зорчих цаг тун удахгүй ирэх нь. Ийм сайхан мэдээ сонсохыг Лондон орж үзсэн нийслэлийн иргэд нэг бус удаа хүссэн л байх. Тэр мөрөөдөл тэнгэрт байхаа больж, Улаанбаатар хотын авто зам дээр газардах цаг хаяанд ирлээ. Дэлхийн өндөр хөгжилтэй зарим орон давхар онгоцоор тэнгэрт зугаалж байхад бид давхар автобусаар хотын төвөөрөө зорчих л учиртай. Тэр дундаа цахилгаан автобусаар шүү.
Нэг удаа цэнэглээд 2 өдөр шугаманд гарч, 400 км явах хүчин чадалтай, зундаа сэрүүцүүлэгчтэй, өвөлдөө халаагууртай, цонх нь цантахгүй энэ автобус нийт 70 хүний суудалтай. “Зорчигч тээвэр 3” ОНӨААТҮГ эхний удаад ийм 10 автобус Монголд оруулж ирээд, туршиж байна. Туршилт амжилттай болбол үйлчилгээнд гаргаж, ирэх жил 40 автобус авчран, 2 давхар автобустай хот болох юм.
Засгийн газрын 2018 оны “Агаарын бохирдлыг бууруулах талаар авах арга хэмжээний тухай” 43 дугаар тогтоол, Засгийн газрын 2018 оны 321 дугаар тогтоолоор батлагдсан “Төрөөс авто тээврийн салбарт баримтлах бодлого”, нийслэлийн засаг дарга бөгөөд Улаанбаатар хотын захирагчийн 2016-2020 оны үйл ажиллагааны хөтөлбөр, Нийслэлийн эдийн засаг, нийгмийг 2019 онд хөгжүүлэх үндсэн чиглэлд заасан зорилт, арга хэмжээнүүдийг хэрэгжүүлэх ажлын хүрээнд “Зорчигч тээвэр 3” ОНӨААТҮГ энэхүү 10 автобусыг оруулж ирж байна. Төлбөрийн 20 хувийг нийслэлийн төсвөөс урьдчилан төлжээ. Үлдсэн 80 хувийг Монголын хөгжлийн банк болон Хятадын хөгжлийн банкнаас 6 жилийн хугацаатай зээлсэн аж.
Энэ удаад зөвхөн давхар автобусаар зогсохгүй, энгийн цахилгаан автобус 36-г, цэнэглэх төхөөрөмж 15, эрчим хүчний дэд станц 4-ийг худалдан авч, нийслэлийн нийтийн тээврийн үйлчилгээнд гаргаж байгаа аж.
20 энгийн автобусны зорчигчийг давхар 10 автобус тээвэрлэнэ. Энэ хэрээр зам дээр түгжрэх, агаар бохирдуулах автобусны тоо цөөрнө. Агаарын бохирдлоо багасгах, авто замын түгжрэлээ багасгах гэж чадан ядан байгаа манай улсын хувьд нийтийн тээвэртээ давхар автобус явуулна гэдэг чухал зүйл.
